أحنا في حياتنا بنلاقي الخيال أجمل ساعات من واقع بنعيشه ومش عارفين نحس فيه بالسعادة وده لأننا علطول لبسين نظارة غامقة صحيح ممكن متكنش سوده بس غامقة ومليانة تراب وشوائب كتير بتحجب عننا الرؤية ساعات أو بتخلينا نشوف الحاجات مشوشة ومش واضحة كفاية علشان نميز هى حلوة وإلا مش مناسبة ولا جميلة ولاحتى تشبهنا وتبقي هى إللى بندور عليها ..
علشان كده بيجري عقلنا للخيال يمكن يلاقي جواه كل إللى يتمناه ومش عارف يوصله …
والسبب أننا مش عارفين ليه بنروح بعيد ونفتح في الخيال ملفات نعيش جواها لحظات سعادة وفرح وكأنه عالم أفتراضى بس موجود وأحنا إللى خليناله وجود بس في خيالنا …
وفي اللحظة دى بنقفل واقعنا ونغمض عقولنا ونبقي عاملين زى الظل بيجى وقت يكون ورانا وفجأة يختفي ..
ياالله …ليه نسيب نفسنا نوصل للمرحلة دى ويكون الخيال هو الملاذ والمكان إللى بنلاقي فيه راحتنا وسعادة مزيفة بس بتدوم دقايق أو ساعات …يمكن علشان مساحة الخيال ملهاش بداية ولا نهاية مساحة رحبه مطلقة كبيرة جدا وكل شىء فيها متاح حتى إللى صعب ومينفعش يكون معانا في الحقيقة…
وفجأة…
فجأة نفوق ونبتدى نبص لحالنا وفين وصلنا وننصدم ويتوه معانا كل واقع سيبنا أهتمامنا بيه أو حتى محاولات العمل عليه علشان نغيره ونقربه للى يرضينا وتكمل معاه رحلة حياتنا…
مش عاوزة الفجأة دى توصلولها دايما سيطروا وخلوا عقلكم هو الملك والقادر القوى إللى يخطط ويدير وينفذ ويوصلك لكل محطة حابب يكون لك فيها أثر وطريق ..
أبعد خيالك شوية ريحة شيله في علبة وأقفل عليه في صندوق الصور ومتخليهوش ياخد من وقتك غير ثوانى أيوة ثوانى بس وأرجع بسرعة بعقلك وأبنى جسر حقيقي تعدى بيه أى صعب كل كرب أو محنة صعبة ومستحيلة وبنعمة العقل حتكتشف قوتك وقدرتك علشان تكمل وتفضل واقف زى المناره ترشد سفن في بحر واسع علشان توصل لمرسى أمن وشط كله حقيقة وخير …
د.صفاء مختار .
